გასულ სეზონში, ”ნოუ კამპზე” გასამართ კლასიკომდე 2 დღით ადრე ჩავი ”სან ჟოან დესპიში”, ”ბარსელონას” ბაზაზე სავარძელში იყო მოკალათებული და ინგლისელ ჟურნალისტს ინტერვიუს აძლევდა. ჟურნალისტმა ჩავის ჰკითხა, თუ როგორ გრძნობდა თავს ”ბარსასთან” ერთად 6 ტიტულის მოგების შემდეგ, რაზეც ჩავიმ უპასუხა: ”ახლა ”ბარსელონას” ფეხბურთელები უნდა დარჩნენ მოკრძალებულები და არ დაკარგონ თავი”. შეკითხვაზე, არის თუ არა ესპანეთის ეროვნული ნაკრები მსოფლიოს ჩემპიონატის ფავორიტი მან მიუგო: ”ესპანეთი არ არის ფავორიტი. საჭიროა ყველაფერი მოედანზე დავამტკიცოთ. მსოფლიოს ჩემპიონატის მოგება ჩემი უდიდესი ოცნებაა”. როდესაც კორესპონდენტმა ჩავის კითხა, თუ ფიქრობდა ის ოდესმე კლუბის შეცვლის შესახებ მან სერიოზული საუბარი დაიწყო: ”რადგან თქვენ ინგლისიდან ხართ ერთ რამეს გეტყვით. მე ყოველთვის მომწონდა მეტა ლე ტისიეს თამაშის ყურება. მან მთელი ცხოვრება ”საუთჰემპტონში” ითამაშა. პატარა კლუბში, პატარა სტადიონით. ლე ტისიე ძალიან ჭკვიანი მოთამაშე იყო. მას წამყვანი ჩემპიონატების გრანდები ეძახდნენ, მაგრამ დარჩა იქ, სადაც მისი გული იყო. მე არასდროს მსურდა სხვა გუნდში თამაში. ჩემი სურვილი იყო, რომ მეთამაშა ”ბარსელონაში” რაც შეიძლება დიდი ხანი. მე სერიოზული წინადადებით მომმართეს ”მანჩესტერმა” და ”მილანმა”. ფული ჩემთვის მთავარი არ არის. მე ხომ ”ბარსელონას” გულშემატკივარი ვარ ბავშვობიდან. მახსოვს როგორ მომწონდა ბერნდ შუსტერის თამაში. ის იყო მაღალი, გრძელი ქერა თმებით. ჩემს მშობლიურ ტერასაში ადამიანი ესეთი შეხედულებით ნანახი არ მყავდა. ჩემს მეორე კუმირად დიეგო მარადონა იქცა, ხოლო მესამედ გვარდიოლა. თავიდან პეპი მომწონდა როგორც მაყურებელს, შემდეგ ის ერთ-ერთ უმნიშვნელოვანეს ადამიანად იქცა ჩემს ცხოვრებაში”.

ჩავი გვარდიოლას მემკვიდრედ იქცა. სწორედ ტერასას მკვიდრმა შეცვალა ტრავმირებული გვარდიოლა 1999-2000 წლის სეზონში. ეს არ იყო ადვილი. ეს იყო გულის გადანერგვის მსგავსი რამ. ჩავი გაუმკლავდა თითქოსდა შეუსრულებელ მისიას. მან აჯობა გვარდიოლას თითქმის ყველაფერში. ჩავიმ მოიგო მეტი ტიტული, ითამაშა პეპზე მეტი მატჩი და კლუბის ისტორიაში ნათამაშები მატჩების რაოდენობით მეორე ადგილზე იმყოფება. გვარდიოლას პასები მოედნის ცენრტიდან, რომელსაც ეძახდნენ "მეკარესთან პირისპირ გამყვან პასებს" ეხლა საჭიროა თქვა ”ჩავის პასი” და ყველა მიხვდება რაზეცაა საუბარი.

                                 

”ჩავი ღირსია, რომ ითვლებოდეს საუკეთესო ნახევარმცველად ”ბარსელონას” ისტორიაში” - განაცხადა გვარდიოლამ 2010 წლის მაისში. ჩავიმ მონაწილეობა მიიღო ”ვილიარეალთან” მატჩში ტრავმირებული ფეხით და რეციდივის შემთხვევაში მსოფლიოს ჩემპიონატის გამოტოვების საფრთხის წინაშე დგებოდა. ამ მატჩში ჩავიმ შესანიშნავად ითამაშა და ”ბარსას” გამარჯვებაში მნიშვნელოვანი როლი ითამაშა.

სტატისტიკის მიხედვით ჩავი გვარდიოლას ლა ლიგის ტიტულების რაოდენობით ჩამორჩება. ჩავის პრიმერა დივიზიონი მოგებული 5-ჯერ აქვს. მას ერთი ტიტულით მხოლოდ გვარდიოლა და რამალიესტე უსწრებენ. გვარდიოლას ხელმძღვანელობით ჩავი გეგმავს პეპს ამ მაჩვენებელშიც დაეწიოს.

”წინ კიდევ ბევრი მიზანი მაქვს, ერთ-ერთი მათგანი არის მიგელის რეკორდის დამხობა და კლუბის ისტორიაში ნათამაშები მატჩების რაოდენობით საუკეთესოდ გახდომაა, მაგრამ მთავარი არა პირადი, არამედ კლუბის ინტერესებია. მე ყველაფერი მოვიგე, თუმცა ამ ტიტულების მოგება კვლავ მსურს. მოგება ნარკოტიკივითაა. როცა ტიტულს იგებ მისი მოგება შემდეგ უფრო მეტად გსურს. მოგებები არ გადუნებს, ისინი ძალას გმატებენ”.

”ბარსელონა”, რომელიც სავსეა საკუთარი აღზრდილებით ვერავის გააკვირვებ კლუბისადმი სიყვარულით. ჩავი მაინც გამოსარჩევია. ამ გაზაფხულს, ”ნოუ კამპის” ”პარიზულ” დარბაზში ”Unicef”-ი მესის ელჩად ირჩევდა. ამ ცერემონიაზე ”ბარსას” ფეხბურთელებიდან მხოლოდ ჩავი მივიდა. ყველა სავარძელი დაკავებული იყო. ჩავი მთელი საათი კარებთან მიყუდებული იდგა და ისე უკრავდა მესის ტაშს.

და კიდევ, ჩავი ერთადერთი ფეხბურთელია, რომელიც მოდური უბნების გარეთ ცხოვრობს. ჩავი მშობლიურ ტერასაში ცხოვრობს, რომელიც ბარსელონადან 30 კილომეტრშია. ”ბარსელონა ძალიან მიყვარს, მაგრამ ტერასაში ჩემი გულია” - აღიარა ნახევარმცველმა. ”ჩემს სახლთან ახლოს ცხოვრობენ მშობლები, ჩემი და, ბავშვობის მეგობრები. მე აქ ბედნიერი ვარ და მეტი არაფერი მსურს”.

                                    

დანი ალვესი (”ბარსელონას” მცველი)
”ჩვენ ყველა ეხლა ვცხოვრობთ, ხოლო ჩავი მომავალშია. ეს ერთადერთი ახსნაა იმის, თუ რას აკეთებს ის მოედანზე. მე ყოველთვის ვფიქრობდი, რომ ფეხბურთი მხოლოდ ათლეტი ფეხბურთელების თამაში არ იყო. ეს არის ისეთი პატარა ფეხბურთელების თამაში, როგორებიც ჩავი, ინიესტა და პედრო არიან”.

იკერ კასილიასი (მადრიდის ”რეალის” მეკარე)
”ჩავი ”ბარსელონაში” მთავარი ფიგურაა. მას გუნდის თამაში მიჰყავს, ხედავს მთელ მოედანს. როცა ჩავი შენს წინააღმდეგ თამაშობს ერთი წამითაც არ უნდა მოდუნდე. ჩავი შესანშნავი ადამიანია და მიხარია, რომ უკვე 13 წელია ვმეგობრობთ”.

ჟოან ლაპორტა (”ბარსელონას” ყოფილი პრეზიდენტი)
”ჩავის მხოლოდ ”ბარსელონა” აინტერესებს. ჩვენ ვიცით, რომ ჩავი მხოლოდ ”ბარსაში” ითამაშებს. მან კი იცის, რომ კლუბი მის გამო თავს არ დაზოგავს. ის გუნდის წამყვანი ფეხბურთელია და მაგალითია ახალგაზრდებისთვის. მისი კარიერით ჩავი შესანიშნავ მაგალითს იძლევა, თუ როგორ შეიძლება მიაღწიო წარმატებას მონდომების და მიზანდასახულობის შედეგად”.