გუშინდელი მატჩის დასრულებისთანავე, პრესკონფერენცია გამართა "არმიელთა" დამრიგებელმა, ლეონიდ სლუცკიმ. მისი განცხადებით, ფავორიტი მადრიდის "რეალია", თუმცა რუსები ყველაფერს გააკეთებენ საპასუხო მატჩში მეტოქის დასამარცხებლად და მომდევნო ეტაპზე გასასვლელად.
სტუმრებმა გოლი 28-ე წუთზე შეაგდეს, მთელი 90 წუთის მანძილზე დომინირებდნენ მეტოქეზე, თუმცა საფინალო სასტვენამდე 30 წამით ადრე დაისაჯნენ. რუსებს შანსი კვლავ აქვთ, მაგრამ, როგორც მინიმუმ, ერთი გოლის გატანა მართებთ "სანტიაგო ბერნაბეუზე". სწორედ ამასთან დაკავშირებით ისაუბრა სლუცკიმ, როდესაც განაცხადა, რომ მის გუნდს შეუძლია სათანადო წინააღმდეგობა გაუწიოს ისეთ გუნდს, როგორიც მადრიდის "რეალია". მეტიც, მოსკოველთა თავკაცმა გამარჯვების შანსებზე ისაუბრა.
"ყველას კარგად ახსოვს, თუ როგორ გავაგდეთ "სევილია" ამავე ტურნირიდან. მაშინაც, როგორც ახლა, საშინაო მატჩში ფრედ ვითამაშეთ და სტუმრად დავამარცხეთ მეტოქე", - თქვა სლუცკიმ.
"ვაღიარებ, რომ ჩვენი მეტოქე ფავორიტის რანგშია, თუმცა ბოლო წამებზე გატანილმა გოლმა მომდევნო ეტაპზე გასვლის საკმაოდ რეალური შანსები გაგვიჩინა".
"არმიელთა" დამრიგებელმა ისიც დაამატა, რომ მისი გუნდი 90 წუთის განმავლობაში ცდილობდა გოლის გატანას, მეტოქე გუნდი კი საგოლე მომენტების სიმცირეს განიცდიდა.
"ჩვენ შეცდომები პირველ ტაიმში დავუშვით; ასე რომ არ ყოფილიყო, მატჩი 0:0 დასრულდებოდა. დაცვითი ფუნქციების შესრულებისას ყველაფერი გამოგვდიოდა, მაგრამ შეტევაში ხარვეზები შეიმჩნეოდა".
"შეცდომა მხოლოდ რამდენიმე ეპიზოდში დავუშვით, ერთ-ერთ ასეთ შეცდომას კი გოლი მოჰყვა. ხანდახან ჩვენს ნახევარმცველებს არ გამოსდიოდათ სათანადოდ ყველაფერი. საუბარია მაქვს მათზე, რომლებსაც მომენტების შექმნა აკისრიათ".
"მატჩის ბოლო წუთებზე, მთელი გუნდით გადავედით შეტევაში. პრინციპში, დასაკარგიც არაფერი იყო. შემიძლია ვთქვა, რომ დამსახურებული გოლი გავიტანეთ", - დაასრულა სლუცკიმ.
