მოგვიანებით უილიამსი გამოჩნდა ჯგუფის Oasis წევრთა საზოგადოებაში. იმატა ჭორებმა, რომ იგი სოლო-კარიერას იწყებდა და ჯორჯ მაიკლის წრეშიც ტრიალებდა. კონტრაქტის მიხედვით, მას არ შეეძლო სოლო-კარიერის დაწყება, სანამ ჯგუფიც არ დაიშლებოდა და ვინაიდან პირობები დარღვეული იქნა (როგორც მოგვიანებით გამოჩნდა), სმითმა მისგან 200.000 ფუნტის ოდენობის ანაზღაურება მიიღო. მიუხედავად დანაკარგისა, ჯგუფმა მოაწყო მოკლე საკონცერტო ტური Nobody Else, ოთხი წევრის სახით. ამ ტურს ივლისში წერტილი დაესვა, რასაც თან დაერთო სინგლის "Never Forget" გამოცემა.

1996 წლის 13 თებერვალს ჯგუფმა განაცხადა, რომ იშლებოდა. დამშვიდობების სახით გამოიცა კრებული Greatest Hits, სადაც მოხვდა ბი ჯიზის ცნობილი ბალადის "How Deep Is Your Love" ქავერ-ვერსია, შემდგომში ქცეული ჯგუფის უკანასკნელ #1 სინგლად (2006 წლის დაბრუნებამდე). ოთხეულის უკანასკნელი შოუ მოეწყო 1996 წლის აპრილში, ამსტერდამში. ^[8] მაგრამ განცხადებას დაშლის შესახებ მშვიდად არ ჩაუვლია - მილიონობით მსმენელი დეპრესიაში ჩავარდა. ინგლისში, მაგალითად, ეს გამოიხატა მრავალი მოზარდი გოგონას თვითმკვლელობის მცდელობებით. მთავრობამ სპეციალურად აამუშავა ცხელი სატელეფონო ხაზი, რომელზეც ასეთ მდგომარეობაში ჩავარდნილ ახალგაზრდებს კონსულტაციებით ამშვიდებდნენ. ^[9]